يعنى اية برا او حماله صدر وايه المقصود بالحروف والأرقام  ؟

حمالة الصدر أو البرا، مشكلة كبيرة عند أغلب البنات والستات، رغم إنها أساسية في الدولاب، وبتتلبس بشكل يومي من أول مرحلة البلوغ وممكن من قبلها كمان.

بس لسه مش بنعرف إزاي نشتري البرا، سواء الشكل المناسب لجسمنا أو حتى المقاس المناسب. دي خطوة أساسية في اختيار البرا.

الأول تعالى نسال سؤال البرا او حماله الصدر بتكون من ايه ؟

البرا بيكون من 3 أجزاء:

1. جزء “الكب” اللي يحتوي الصدر
2. جزء الحمالة
3. جزء الدوران الى هو محيط الجسم .

عشان تعرفي إن مقاس البرا مناسب ليكي

• لازم الـ3 أجزاء يكونوا مرتاحين، يعني الصدر مش خارج من الكب ولا إنه يكون فيه فراغ او بالبلدي (فاضي).
• الحمالة لا تكون مشدودة على الآخر وفي نفس الوقت لا تكون ضاغطة عليكى.
• أما الدوران فلازم البرا يكون يقفل على أول كبسونة، لانه بعد كده بيوسع وتحتاجي تضيقيه
• كمان لازم يبقى فيه فراغ يسمح بمرور إصبع بين ظهر البرا وظهرك.

حمالات الصدر عامة بتنقسم لنوعين: 

1. نوع wired بيبقى فيه سلك معدني (ناس كتير بتسميه برا بحديدة)، ده لزيادة الدعم للصدر.
2. نوع non-wired وده مفيهوش السلك المعدني.

• الكب مقاساته بتكون بالحروف الإنجليزي حيث حرف B هو الأصغر: B, C, D, DD.

الدوران مقاساته بتكون بالأرقام: 30، 32، 34، 36 حتى مقاس 48